لوح و قلم کی قید سے آزاد کر مجھے

 

 

لوح و قلم کی قید سے آزاد کر مجھے

دنیا میں آ گیا ہوں تو آباد کر مجھے

شعروں میں ٹوٹ ٹوٹ کے نازل نہ ہو سکا

مثلِ صدائے کُن کبھی ارشاد کر مجھے

مجھ کو کسی خیال کے خوابوں پہ فاش کر

حیرت سرائے دہر میں ایجاد کر مجھے

ساتوں کے سات در مِرے اندر ہی کھول دے

آبادیوں کے بیچ میں برباد کر مجھے

مجھ میں لگا ہے میرے ہی چہروں کا جمگھٹا

رکّھا ہے اتنے بوجھ سے کیوں لاد کر مجھے

احمد سلمان